कालिगण्डकी करिडोरको पर्वत खण्डमा ३ वटा मोटरेवल पुल निर्माण हुने

bikashnirman | पुस १८, २०७४ - मङ्लबार


पर्वत । राष्ट्रिय गौरवको आयोजना उत्तर दक्षीण जोड्ने कालिगण्डकी करिडोरको पर्वत खण्डमा ३ वटा मोटरेवल पुल निर्माण हुने भएको छ ।
करिडोरमा पर्ने पर्वतको कुश्मा र फलेवास नगरपालिकाको बिचमा पर्ने मोदीखोला पुल, फलेवास र कुर्घाको बीचमा पर्ने लमायाखोलाको पुल, सेतीवेणीको सेतीखोलामा सेतीखोला मोटरेवल पुल निर्माणको कार्य अगाडी बढाईएको हो । मोदीखोला मोटरेबल पुलको निर्माण कार्य मुक्तिनाथ कन्स्ट्रक्सन र ओम गौचन मार्फत् अगाडि बढाइएको छ भने लमाए खोलाको मोटरेबल पुलको नयाँ वाटो गौचन जे.भि.ले जिम्मा लिएको छ । त्यस्तै सेतीखोला मोटरेवल पुल निर्माणको जिम्मा सो एन.विर्लस कम्पनीले लिएको बताइएको छ ।
मोदीखोलामा ९ करोड १४ लाख को लागतमा ६० मिटर लम्बाईको आधुनिक मोटरेवल पुल निर्माण हुने भएको हो भने लमाए खोलामा ५ करोड ६४ लाख ५१ हजारको लागतमा २५ मिटर लम्बाईको मोटरेवल पुल निर्माण हुन लागेको कालिगण्डकी करिडोर योजना प्रमुख नारायणदत्त भण्डारीले जानकारी दिनुभयो । उहाँका अनुसार सोतीखोलामा भने ५ करोड ८६ लाख को लागतमा २५ मिटर लम्बाईको मोटरेवल पुल निर्माण हुने छ । कालिगण्डकी करिडोर परियोजना को बजेट बाट निर्माण हुन लागेका ३ वटै मोटरेवल पुल अर्को आर्थीक बर्ष भित्रमा निर्माण गरिसक्ने लक्ष्य रहेको छ ।
कालिगण्डकी करिडोर अन्तर्गत पर्वतको सदरमुकाम कुश्मादेखि स्याङजाको मिर्मी सम्मको करिब ६८ किलोमिटर सडक खण्डमा ट्र्याक खुलाउने तथा स्तरवृद्धिको काम भइरहेको छ । उक्त करिडोर दक्षिणमा रहेको पूर्वपश्चिम राजमार्गबाट प्रारम्भ भई तीन अञ्चल नौ जिल्ला हुँदै उत्तरी छिमेकी राष्ट्र चीनको कोरला नाकासम्म जोडिएकाले यस क्षेत्रको विकासका लागि मेरुदण्डका रुपमा लिइएको छ । कालिगण्डकी करिडोरको बाग्लुङ खण्ड भन्दा पर्वत खण्डको यात्रा करिब १२ कि.मी.छोटो हुने बताइएको छ ।
निमार्ण हुन लागेका पुलको शिलान्यास प्रदेश सांसद एवं संबिधान सभाका पुर्व सदस्य विकास लम्सालले गर्नुभएको हो । पुलको शिलान्यास गर्दै सांसद लम्सालले सडक निर्माणको क्रममा नदी तथा खोलाहरुमा पुल निर्माण अपरिहार्य रहेकाले पुलहरुको निर्माण बिना सडक निर्माणले पूर्णता पाउन नसक्ने हुदाँ सडकको निर्माणको काम र मोटरेवल पुल निर्माणको कार्य लाई एकै साथ अगाडी बढाएको बताउनुभयो । लम्सालले करिडोरले राष्ट्रिय एकीकरण आर्थिक सामाजिक विकास र प्रादेशिक सन्तुलनमा योगदान पुग्ने बताउदै उक्त करिडोर लाई नेपालकै लाईफ लाईनको रुपमा विकास गर्नुपर्नेमा जोड दिनुभयो ।
स्याङ्जा र पर्वत जिल्लाका स्थानीय बासिन्दालाई सडक सञ्जालले जोडेपछि उनीहरूको दैनिकी फेरिने बताउनुभयो । उहाँले उक्त करिडोर सञ्चालनमा आए पश्चात स्थानीए स्तरमा उत्पादीत बस्तुहरु लाई छिमेकी देश भारत र चिनमा निर्यात गर्न समेत सहज हुने बताउनुभयो । लम्सालले धौलागिरि, लुम्बिनी, गण्डकी अञ्चलका पर्यटकीय स्थलका साथै पर्वतको शिला शालिग्राम,अल्पेश्वर गुफा,मल्लाज र पैँयू दरबार क्षेत्रमा समेत यो राजमार्गबाट फाइदा पुग्ने बताउनुभयो । लोकमार्गले चिनियाँहरू लाई गौतम बुद्धको जन्मस्थलो लुम्बिनी र भारतीयहरू लाई मुक्तिनाथ धाम सम्मको यात्रा सहज र छोटो बनाउने हुदाँ बिदेशी पर्यटकहरुले उक्त सडक प्रयोग गर्दा स्थानीएहरु लाई ठुलो फाईदा पुग्ने बताउनुभयो । करिडोर निर्माणपश्चात् यस क्षेत्रको गरिबी निवारणमा ठूलो सहयोग पुग्ने लम्सालको भनाई थीयो । यस आर्थीक बर्ष फलेबासदेखि आँधी मुहानसम्म वर्षायाममा पनि सीधा यातयात सञ्चालन गर्ने तयारीका साथ काम अगाडि बढाउन सम्भव भएका सबै प्रयास गरिएको बताउनुभयो ।

Comment from facebook

Top